Ghazal...chehra mera tha

Chehra mera tha,nigaahein uski
khamushi me bhi wo baatein uski

mere chehre pe ghazal likhti gai'n
sher kahti hui aa'nkhen uski

dhyaan me uske ye aalam tha kabhi
aankh mahtaab ki,yaadein uski

rang joinda wo,aaye to sahi!
Phool to phool hain,shaakhein uski

faisla mauj e hawa ne likkha
aandhiyan meri,bahaarein uski

neend is soch se tooti aksar
kis tarah kat'ti hain raatein uski

door rah kar bhi sadaa rehti hain
mujhko thaame hue baahein uski!!

Us waqt...

Jab ankh mein shaam utre
palko'n pe shafaq phooley
kajal ki tarah,meri
ankho'n ko dhanak chhu ley
us waqt koi usko
ankho'n se meri dekhe
palko'n se meri chumey...

Ghazal...aj malboos mein hai

Aj malboos me hai kaisi thakan ki khushbu/raat bhar jaagi hui jaise dulhan ki khushbu
Pairahan mera magar uske badan ki khushbu/us ki tarteeb hai ek ek shikan ki khushbu
Qaamat e sher ki zebaai ka aalam mat puch/maherban jab se hai us sarru badan ki khushbu
Aariz e gul ko chhuwa tha ke dhanuk si bikhri/kis qadr shoukh hai nannhi si kiran ki khushbu
Is aseeri mein bhi har saans ke sath aati hai / sehan e zandaan mein unhen dasht e watan ki khushbu.

Ghazal...Raqs me raat...

Raqs me raat hai badan ki tarah/ baarishon ki hawaa me, ban ki tarah~
Chaand bhi meri karwaton ka gawaah/mere bistar ki har shikan ki tarah~
Chaak hai daaman e qubaa e bahaar/mere khwaabon ke pairahan ki
tarah~ Zindgi,tujh se dur rah kar,main/kaat lungi jilaa watan ki
tarah~ Mujh ko tasleem mere chaand ke main/tere hamraah hun gahen ki
tarah~ Barhaa tera intzaar kiya/apne khwaabon me ek dulhan ki tarah.

Ek sher...

Khushbu bataa rahi hai ke wo raste mein hai/ mauj e hawa ke haath mein
uska suraagh hai...

Gazal...khuli ankhon se...

Khuli ankhon se sapna jhankta hai.
Wo soya hai ke kuch kuch jagta hai~
Teri chaahat ke bheege jangalon mein
mera tan mor ban kar naachta hai~
Mujhe har kaifiyat me kyun na samjhe
wo mere sab hawaale janta hai~
Main uski dastaras me hun magar wo
mujhe meri razaa se mangta hai~
Kisi ke dhyaan me dooba hua dil
bahaane se muje bhi taalta hai~
Sadak ko chod kar chalna padega
ke mere ghar ka kachcha rasta hai...

Eiteraaf

Jane kab tak teri tasveer nigaahon me rahi...
hogai raat tere aks ko takte takte...
phir maine tasauvvur ke kisi lamhe mein...
teri tasveer pe lab rakh diye ahista se...